راه مدنیت: عبدالله عبدالله، رییس شورای عالی مصالحۀ ملی، در ادامۀ سفرهای منطقه‌یی خود امروز به تاجیکستان رفت.
شورای عالی مصالحۀ ملی صبح امروز دوشنبه (۱جدی) در اعلامیه‌یی گفت که یک هیات بلند‌پایۀ دولتی در این سفر آقای عبدالله را همراهی می‌کند.
شورای عالی مصالحۀ ملی علاوه کرد که آقای عبدالله برای جلب حمایت از تلاش‌های صلح و تقویت اجماع منطقه‌یی به دعوت رسمی تاجیکستان، عازم شهر دوشنبه شده است.
رییس شورای عالی مصالحۀ ملی قرار است در جریان این سفر با امام‌علی رحمان، رییس‌جمهوری، قاهر رسول‌زاده نخست‌وزیر، محمدطاهر ذاکرزاده، رییس مجلس نمایندگان و سراج‌الدین مهرالدین، وزیر خارجۀ جمهوری تاجیکستان، دیدار کند.
این سفر در حالی به تاجیکستان صورت می‌گیرد که آقای عبدالله پیش از این نیز برای جلب حمایت‌های منطقه از روند صلح افغانستان، به پاکستان، ایران، هند، ازبیکستان و ترکیه سفر کرده و با مقام‌های این کشورها در مورد صلح و اجماع منطقه‌یی دیدار و گفتگو کرده بود.
هم‌چنین مرحله اول گفتگوهای صلح به‌دلیل مشورت در آجندای دور دوم تا ۵جنوری سال ۲۰۲۱ متوقف شده است.
به تلگرام راه مدنیت بپیوندید
