امام‌علی رحمان: از تلاش‌های صلح و برقراری ثبات حمایت می‌کنیم

امام علی رحمان، رییس‌جمهوری تاجیکستان در دیدار با عبدالله عبدالله گفت که از تلاش‌های صلح و برقراری ثبات در افغانستان حمایت می‌کند.
شورای عالی مصالحۀ ملی کشور امروز سه‌شنبه (۲جدی) با نشر خبرنامه‌یی افزود که در این دیدار آقای رحمان ابراز امیدواری نمود که تلاش‌های صلح تحت رهبری دولت در افغانستان به پیروزی برسد.
رییس‌جمهوری تاجیکستان، افغانستان را از دوستان و متحدان نزدیک تاجیکستان خواند و تاکید داشت که این روابط ریشه در همسایگی، مشترکات تاریخی، فرهنگی و دینی دارد.
وی با اعلام حمایت همه جانبۀ کشورش از تلاش‌های صلح در افغانستان، صلح و ثبات در کشور را صلح و ثبات در تاجیکستان، منطقه و فراتر از منطقه خواند.
آقای رحمان در ادامۀ صحبت‌های خود افزود که افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینۀ گسترش و توسعۀ تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.
از سویی هم، عبدالله عبدالله، رییس شورای عالی مصالحۀ ملی با ابراز قدردانی از دولت و ملت تاجیکستان، افزود که روابط و دوستی میان دو کشور بر ارزش‌ها و مشترکات تاریخی، فرهنگی و دینی دیرینه استوار است و از حمایت و همکاری‌های تاجیکستان از داعیۀ برحق مردم افغانستان در دوره‌های مختلف سپاس‌گزاریم.
وی در بارۀ تلاش‌های صلح، مذاکرات دوحه، دور بعدی مذاکرات، سفرهای اخیر برای کسب اجماع منطقه‌‌یی و نقش جمهوری تاجیکستان در تامین صلح در افغانستان صحبت نمود.
آقای عبدالله در صحبت‌های خود تاکید کرد که افغانستان در مذاکرات صلح به دست‌یافتن صلح پایدار، عادلانه، باعزت و با حفظ ارزش‌های جمهوریت متعهد می‌باشد.
رییس شورای مصالحۀ ملی همچنان از افزایش خشونت و جنگ به عنوان یکی از نگرانی‌های حکومت و مردم افغانستان در این مرحله یاد نموده و بر ختم جنگ و قطع‌ خون‌ریزی در جریان مذاکرات تاکید کرد.
به گفتۀ وی، افغانستان می‌تواند از تجربۀ صلح و آشتی ملی تاجیکستان استفاده نماید.
این سفر در حالی انجام می‌شود که آقای عبدالله قبل از این به کشورهای ایران، ترکیه، پاکستان، هند و ازبیکستان جهت جلب حمایت‌های منطقه‌یی از صلح افغانستان سفر نموده است.

به توییتر راه مدنیت بپیوندید