رییس‌جمهور به تاجیکستان دعوت شد

رییس‌جمهور غنی در تماسی تلیفونی با همتای تاجیکستانی‌ خود، از سوی امام‌علی رحمان برای سفر رسمی به تاجیکستان دعوت شد.

راه مدنیت: ریاست‌جمهوری، صبح امروز دوشنبه (۳سنبله) با نشر اعلامیه‌یی خبرداد که  میان محمداشرف غنی و امام‌علی رحمان صحبت‌هایی در مورد همکاری‌های دو جانبه به ویژه در امتداد سواحل دریای آمو صورت گرفته است.

این تماس پس از آن انجام شد که رییس‌جمهور تاجیکستان در ۳۱اسد  در اقدامی غیرمعمول از طریق بلندگو با باشندگان ولسوالی شکی ولایت بدخشان صحبت کرد و به آن‌ها وعده‌ کمک داد.

این حرکت رییس‌جمهور تاجیکستان در شبکه‌های اجتماعی واکنش‌های گسترده‌یی را در پی‌ داشت.

امام‌علی رحمان زمانی با باشندگان ولسوالی شکی بدخشان صحبت کرد که از مناطق مرزی در امتداد دریای آمو در مرز با افغانستان بازدید می‌کرد.  او درهنگام بازدید با استقبال گرم باشندگان ولسوالی شکی بدخشان روبرو شد.

رییس‌جمهور غنی به همتای تاجیکستانی‌اش گفت سرحد افغانستان و تاجیکستان به نقطه‌ دوستی و پیشرفت دوکشور مبدل می‌شود و نمونه‌ دوستی و همکاری خوب میان دو کشور همسایه خواهد بود.

 امام‌علی رحمان نیز از روند صلح به رهبری حکومت افغانستان حمایت کرد و وعده داد که این کشور در نشست‌های منطقه‌یی و بین‌المللی در کنار دولت افغانستان خواهد بود.

رییس‌جمهور تاجیکستان، به منظور گسترش روابط دوجانبه و توسعۀ همکاری‌ها از رییس‌جمهور غنی به دوشنبه، پایتخت تاجیکستان دعوت کرد و او این دعوت را پذیرفت.

رییس‌جمهور غنی نیز از امام‌علی رحمان به خاطر سفر رسمی به کابل دعوت کرد.

آن‌ها توافق کردند که در آینده‌‌یی نزدیک محمدحنیف اتمر، سرپرست وزارت خارجه افغانستان به تاجیکستان سفر کند تا به گونه‌یی مشترک با مقام‌های تاجیکستانی روی آجندای نشست رییسان جمهور دو کشور کار کنند.