راه مدنیت: وزارت خارجه اعلام کرده که چهارمین نشست گروه تماس افغانستان در چهارچوپ سازمان همکاری‌های شانگهای در روزهای سه‌شنبه و چهارشنبه (۲۲ و ۲۳ سرطان) در دوشنبه، پایتخت تاجیکستان برگزار می‌شود.
وزارت خارجه با نشر خبرنامه‌ای گفته که این نشست در سطح وزیران خارجه کشورهای عضو سازمان همکاری‌های شانگهای برگزار خواهد شد.
در ادامه آمده که محمد حنیف اتمر، وزیر خارجه کشور برای شرکت در این نشست در رأس یک هیأت عالی‌‌رتبه راهی دوشنبه، پایتخت تاجیکستان شده‌است.
وزارت خارجه گفته که قرار است در این نشست روی عضویت افغانستان در سازمان شانگهای، همکاری‌های این سازمان با افغانستان در امر مبارزه مشترک علیه تروریزم و افراط‌گرایی، اوضاع امنیتی افغانستان و تاثیرات آن بر ثبات و رفاه منطقه، گفت‌وگو شود.
پیش‌تر یک دیپلمات روسی گفته بود که بحث روی نحوه کمک‌های اجتماعی و اقتصادی به افغانستان در دستور کار نشست سازمان همکاری‌های شانگهای قرار دارد.
سازمان همکاری شانگهای، سازمانی میان دولت‌ها است که برای همکاری‌های چندجانبه امنیتی، اقتصادی و فرهنگی تشکیل شده‌است. این سازمان در سال ۲۰۰۱ توسط رهبران چین، روسیه، قزاقستان، قرقیزستان، تاجیکستان و اوزبیکستان با هدف برقرار کردن موازنه در برابر نفوذ امریکا و ناتو در منطقه، ایجاد شد.
